6/6

I got this email in my inbox and i laughed and i just had to share it with you, whoever wrote it is a Guinness.. She said everything i wanted to say and more... allah ya36eha el 3afiya.. if i only knew who it was, i would send her an email to personally thank her for voicing out her thoughts... anyways,,, here is what she wrote.. enjoy..

والله الدنيا ترى ماتسوى.... والرب واحد والعمر واحد
ياجماعة نبي نفتح الإيميل عشان نستانس، مو عشان تلوع كبدنا
ياجماعة نبي نضحك، نبي نحب الحياة، نبي نتعلم شي جديد مفيد ما اييب الغلقة وضيقة الخلق... كفاية الدنيا فيها أحزان ومصايب.. بعدالإيميل ما خليتوه في حاله؟؟

***********

إلا عصير البرتقال ماركة الديك يسوي سرطان
وإلا كورن فلكس النمر يسبب داء الجنون
والبلاليط مصنوع من أمعاء القطط

**********

ABCD XWZ 007 والفاضيين: قائمة بالمواد الغذائية اللي فيها مادة

واللي تقطع النسل وتذبح جميع البشر وتسبب التسونامي
واللي أفضى منهم: الدونت والبطاطس المقلية مخطط شنيع لنشر الصهيونية بواسطة دهن الخنزير

***********

والمصدقين روحهم: أمريكا تغزو ديار المسلمين بواسطة شيبس ليز وسنكرز، وقد وجب الجهاد

**********

واللي عادين روحهم أطباء
شرب الماء البارد بعد المجبوس = سرطان القولون، وإلا سرطان الجهاز الهضمي كله أحسن
شرب اللبن قبل الدجاج المشوي التندوري (مو البروستد) = قرحة في المعدة إلى الأبد وماتروح
أكل السلطة في صحن مسطح من غير ليمون = ديسك في الظهر والرقبة واليد اليسرى
ومع ليمون = التهاب المفاصل والركب والإصبع الصغير
عدم أكل وجبة الإفطار الساعة 6 = انسداد في الأوردة بالإسمنت
خبز الخباز = أمراض الكبد وإنفلونزا الدجاج

***********
واللي عادين روحهم أصحاب نصيحة
لا تآكلون سويت - لاتآكلون برجر
لا تآكلون آيس كريم - لا تآكلون سمارتيز
لا تآكلون خبز وجبن
لا لا لا لا لا لا لا لا لا لا
شدعوة...؟؟؟
شنآآآآكل عيل؟؟
كل ما طلع شي جديد ذبحتونا عليه
شيليز وكرسبي كريم وماكدونالد وستاربكس وبيبسي هدوا العالم كله وقرروا يخلون المسلمين يأكلون خنزير
ترى سندرتونا
كل شي مسرطن؟؟؟
يالله
كل شي زين وحلو وناجح فيه دهن خنزير وجزء من المؤامرة الصهيونية الكبرى..؟؟
سلامات
ترى فلسطين راحت بدون دونت كرسبي كريم وأفغانستان يقصفونها كل يوم بقنابل متقدمة مو ببطاطس مكدونالد

***********

تركوا عنكم الخرابيط.... وتركوا عنكم حكي الإشاعات
الموبايل يسبب التفوئيد
والصابون سرطان مباشر ما في كلام
وشامبو جونسون للأطفال اللي كلنا من سنة الطبعة سبحونا فيه واحنا يهال يسبب السرطان ويقضي على الأجيال
واللابتوب يسبب الحصبة
والواير مال تلفزيون الصالة فيه ذبذبات خطيرة تسبب جنون البقر لعيال الفريج

ياحبيبي على وحش التكنولوجيا اللي بيهجم علينا .. لو ما قرينا الإيميلات كان رحنا ضحية الكارثة الإلكترونية البغيضة والوايرات المشربكة

***********

كل مافتحنا الإيميل: إحذروا.... الامر خطير.... لا يجب السكوت عنه
حصل في البحرين: سيدة خذت كارد فيه مادة مخدرة وصادتها دوخة وباقوا فلوسها
هام جداً جداً جداً جداً جداً جداً جداً
حصل في مجمع الدانة واكتشفت الشرطة عصابة تنقل الإيدز
ونفس الإيميل نسخة (ماتعبوا روحهم يغيرون التفاصيل) عن مجمع "الغرير" في الإمارات..
والله شلخ... وشلخ بايخ بعد شالخرابيط؟؟؟ تقصون على الناس؟؟ تطلعون إشاعات وترجونها ليش؟؟؟

***********

وإيميلات الحلال والحرام ومابينهما كوم ثاني
فتاوى الإيميل الحديثة، هذا حرام، وذاك حرااااام مضاعف، وجهنم الحمرا تنطركم كلكم، والموت وعزرائيل يحسبون لكم الدقايق
ياجماعة ترى رب العالمين شديد العقاب صح
بس بعد غفور رحيم، وسعت رحمته كل شئ
والحي أبقى من الميت
والرسول عليه الصلاة والسلام جدّم الفرح على الحزن
والله قال: "ولا تكن فظاً غليظاً

***********

هاذي غير وصايا وتحف الاستهبال
الشيخ فلان مكشوف عنه الحجاب شاف منام اللهم صل عالنبي
وكلكم لازم تقرون الإيميل وتطرشونه حق 10 أشخاص وإلا بينهار سد مأرب... شكو؟؟؟
بسكم عاد من سوالف الترهيب والفتاوى اللي تلف الانترنت كل يوم

***********

وما يبط كبدي الا جماعة "ارسلها"... عشان خاطر حبايب خالة جيرانكم ترسلها... ارسلها ترى بتندم... ارسلها أمانة عليك يوم القيامة.... استحلفك أن ترسلها.. رح زين
وانت منو تحملني أمانة وتستحلفني مرة وحدة يا أخي؟؟؟
داش إيميل وإلا داش حرب؟؟؟
وعيال عمهم: جماعة "انشر".. إعلان أهو؟؟ ولا تسويق إجباري؟؟
ما قاصر الا يقولون لك: "انشر احسن لك" أو "احترم نفسك وانشر"
والا اللي ايقول لك: إذا تبي لا ترسلها... بس الأجر بيروح عليك
يعني الأجر ألحين كله صار في هالإيميل...؟ انصك باب الحسنات يعني؟؟؟
ومن خولكم تطلبون من خلق الله ترسل إيميل؟؟؟ مو على كيفكم من يرسل ومن ما يرسل وشنو يرسل
والمتفلسف يقول لك: لا تخلي الشيطان يقص عليك وما ترسلها
احذر أن يوسوس لك إبليس أن لا ترسلها
حلفوا عاد؟؟؟
الشيطان قاص عليكم وماكل بعقلكم حلاوة وانتوا بس تارسين لنا الـ

inbox

بإيميلات متشابهة كل يوم نفسها توصلنا
وعباقرة الرياضيات: طرشها مرة تكسب 456739832469 حسنة
طرشها مرتين تكسب 849656504594547664444748700000
حسنة
"؟؟؟؟؟؟؟؟؟؟؟؟"
بس ملينا.. حتى الدين ما رحمتوه؟؟
ياجماعة.. "الكلمة طيبة صدقة"
والدين يسر

***********

الإيميل وسيلة تبادل معلومات خفيفة واستفادة... مو منبر فتاوي ، ولا مركز خدمات أمراض الموت... ولا مركز التحذيرات من عصابات البش والدبش، ولا أداة للتنفير من الدين ونشر فتاوى شيوخ سبيس تون
وإذا الإيميل له قيمة وفيه فايدة الكل بينشره بدون صيغة الأمر البايخة.. وطريقة أرجوك أحب خشمك ترسلها
والناس أدرى باللي ينفعهم، ما يحتاجون أحد يقول لهم شنو يسوون
خلوا الإيميل جزء حلو من اليوم، يرسم ابتسامة، ويضيف معلومة

***********

مع تحيات: وحدة طقت كبدها من إيميلات تحتوي المذكور أعلاه